Ashq aankh me aa kar... (GHAZAL)

Ashq aankh me aa kar, haal-e-dil bataate hai'n...
Baat apne ghar ki hai, gair ko sunaate hai'n...

Manzile'n qadam choome, khuawb muskurate hai'n...
'''Azm ke musafir ko, raaste bulaate hai'n'''

Taj phenk do apne, takht chhodh do saare......
Is jahaan-e-faani se, khali haath jaate hai'n

Ye mazaar ke mulla, wo naseeb ke saudey....
Aayate'n bhi quraa'n ki, log bech khate hai'n

Foonk se kabhi mujhko, tum bujha nahi sakte....
is diye ko khud toofa'n, god me khilaate hai'n

Umr dhal gayi lekin, shokhiya'n nahi badlee'n....
Aaj bhi tere gaisoo, khushbuye'n lutaate hai'n

Be-hijaab banjaaran , naachti hai jab koii.......
Ye zameen hansti hai, aasman gaate hai'n

Jugnuo'n kabhi tum ik, shaam mere ghar aao.....
Sunte hai'n andhere bhi, tum se jagmagate hai'n

Gore gore ye bachchey, kiya haseen kaliya'n hai'n....
Titliya'n machalti hai'n, jab ye khilkhilaate hai'n.

ik kitaab dil ki 'adab', likh ke bhool aaye hai'n....
Kuchh waraq magar ab bhi, humko yaad aate hai'n.

BY-- Mansoor Adab Pahaswi.